១.ហេតុអ្វីអ្នកចង់ចាកចេញពីក្រុមហ៊ុនបច្ចុប្បន្ន?
“ហេតុអ្វីបានជាអ្នកចង់ចាកចេញពីក្រុមហ៊ុនបច្ចុប្បន្នរបស់អ្នក? ” ដោយរបៀបណា?
នៅក្នុងការសំភាសន៍ការងារ ក្នុងនាមអ្នកជាបេក្ខជនសំភាសន៍ ជារឿយៗ អ្នកនឹងជួបនូវសំណួរ ចំលើយដែលល្អបំផុត គឺផ្តោតជាសំខាន់នៅលើ ភាពវិជ្ជមាន។ អ្នកអាចឆ្លើយថា “ខ្ញុំមិនមែនកំពុងតែ រត់គេញចេញពីការងារចាស់របស់ខ្ញុំទេ។ តែ ខ្ញុំ កំពុងរត់ទៅរក អ្វីមួយដែលថ្មី សម្រាប់ខ្លួនឯង។”
កុំនិយាយថា: ខ្ញុំរៀនសូត្រមិនបានគ្រប់គ្រាន់នៅក្នុងក្រុមហ៊ុនចាស់របស់ខ្ញុំ ហើយខ្ញុំមានអារម្មណ៍ថា ការងារនៅទីនោះ គឺគួរអោយធុញទ្រាន់។
២.តើអ្នកចូលចិត្តធ្វើការងារម្នាក់ឯងឬជាក្រុម?
«តើអ្នកចូលចិត្តធ្វើការម្នាក់ឯង ឬធ្វើការងារជាក្រុម?» គឺជាសំណួរដែលមិនសូវរំលងឡើយ សម្រាប់ការសម្ភាសការងារ។ តើត្រូវឆ្លើយយ៉ាងដូចម្តេច ដើម្បីទទួលបានពិន្ទុល្អ?ពេលដែលគេសួរបែបនេះ មានន័យថាអ្នកសម្ភាសចង់ដឹងថា តើអ្នកជាមនុស្សប្រភេទណា? ចូលចិត្តភាពឯកោ ឬចូលចិត្តភាពអួរអរ? តើអ្នកមានស្មារតីក្នុងការបំពេញការងារជាក្រុមដែរឬទេ?
អ្នកប្រហែលជាគិតថា អ្នកសម្ភាសពិតជាចង់ឲ្យអ្នកជ្រើសរើសមួយណា ឬអ្នកសម្ភាសគិតថា មួយក្នុងចំណោមពីរល្អជាងគេ។ ប៉ុន្តែមិនមែនបែបនោះឡើយ ម្នាក់ឯង ឬការងារជាក្រុម មិនមែនជាបញ្ហានោះទេ។ ប៉ុន្តែអ្វីដែលសំខាន់អ្នកគួរតែ ឆ្លើយជ្រើសរើសទាំងពីរ ដោយបង្ហាញពីកាលៈទេសៈ មានន័យថា កាលៈទេសៈណា គួរតម្រូវឲ្យអ្នកធ្វើការម្នាក់ឯង កាលៈទេសណាគួរធ្វើការងារជាក្រុម។ ខាងក្រោម គឺជាឧទាហរណ៍ខ្លះៗ អំពីចម្លើយដែលគួរ និងមិនគួរឆ្លើយ៖
ចម្លើយដែលមិនគួរឆ្លើយ៖
- ខ្ញុំចូលចិត្តធ្វើការងារម្នាក់ឯងជាង ពីព្រោះខ្ញុំជាមនុស្សដែលជឿជាក់លើខ្លួន ឯង និងមិនត្រូវការឲ្យអ្នកណាជួយឡើយ ដែលអាចខូចការបាន។
- ខ្ញុំចូលចិត្តធ្វើការជាក្រុម ពីព្រោះគ្រប់ពេលយើងមានអ្នកពិភាក្សា ចេះជួយគ្នា ហើយការងារអាចសម្រេចបានល្អ។
ចម្លើយដែលល្អប្រសើរបំផុត៖
- ខ្ញុំរីករាយជាមួយទាំងការងារម្នាក់ឯង និងការងារជាក្រុម គឺអាស្រ័យតាមស្ថានភាពជាក់ស្តែង ឬគម្រោង ការងារជាក់ស្តែង។ បើការងារនោះតម្រូវឲ្យ ខ្ញុំធ្វើម្នាក់ឯង គឺខ្ញុំគិតថា ខ្ញុំមានភាពឯករាជ្យគ្រប់គ្រងដើម្បីធ្វើ ឲ្យសម្រេច ការងារនោះបានទាន់ពេលវេលា។ ប៉ុន្តែខ្ញុំក៏មានរីករាយជាមួយការងារជាក្រុម និងស្វាគមន៍ ទទួលយករាល់គំនិត និងការសហការរបស់សមាជិក ក្រុមផងដែរ។
៣. តើអ្វី ជាចំណុចខ្សោយរបស់អ្នក?
បេក្ខជនប្រហែលជាមិនសូវ រំលងផុតសំណួរនេះ ក្នុងពេលសម្ភាសន៍ការងារនោះទេ។ តាមពិតទៅ គ្រប់ គ្នាសុទ្ធតែគិតថា “គ្មាននរណាល្អឥតខ្ចោះ” នោះទេ ប៉ុន្តែអ្វីដែលអ្នកសម្ភាសន៍ចង់ដឹងបំផុត មិនមែន ចំណុចខ្សោយទាំងនោះទេ ប៉ុន្តែគេចង់ដឹងថា “តើយើងកែប្រែ ឬប្រើប្រាស់ចំណុចខ្សោយនោះ បានតាមរបៀបណា?”។ការណែនាំ៖
ចំពោះសំណួរនេះ មិនត្រូវឆ្លើយថា ខ្ញុំមិនដឹងពីចំណុចខ្សោយរបស់ខ្ញុំ ឬ ខ្ញុំមិនមានចំនុចខ្សោយនោះទេ។ ចូរចងចាំថា “គ្មាននរណាល្អឥតខ្ចោះ” នោះទេ បើអ្នកប្រាប់គេថា “អ្នកល្អឥតខ្ចោះ” ក៏គ្មាននរណាជឿអ្នកដែរ។ ដោយសារគ្រប់គ្នាសុទ្ធ តែមានចំណុចខ្សោយ ដូចនេះអ្វីដែលសំខាន់តើយើងត្រូវរៀបរាប់ចំណុចខ្សោយរបស់យើង ដោយរបៀបណា?
មានវិធីបីយ៉ាង ដែលយើងត្រូវឆ្លើយនឹងសំណួរខាងលើនេះ។
- ទី១៖ យើងត្រូវចេះកែខៃ ចំណុចអវិជ្ជមាន (ចំណុចខ្សោយ) របស់យើងឲ្យទៅជាចំណុចវិជ្ជមាន (ចំណុចខ្លាំង) វិញ។
- ទី២៖ យើងអាចលើកយកចំណុចខ្សោយណា ដែលយើងធ្លាប់មាន ដោយលើកឧទាហរណ៍ និងបទពិសោធន៍ជាក់ស្តែងដែលយើងព្យាយាមកែប្រែ និងរបៀបឈ្នះលើវា។
- ទី៣៖ យើងអាចលើកឡើងចំណុចអវិជ្ជមានទាំងឡាយណាដែលមិនពាក់ព័ន្ធនឹងការងារ ឬ តួនាទីដែលយើងកំពុងសម្ភាសនោះ។
ចម្លើយដែលមិនគួរឆ្លើយ៖
- ខ្ញុំធ្វើការខ្លាំងពេក (Work too hard) ហើយពេលខ្លះ ខ្ញុំមកធ្វើការយឺតដែរ។
- ពេលបំពេញការងារ ខ្ញុំត្រូវការឲ្យគេពន្យល់លំអិតរបស់ការងារនោះ។
- ខ្ញុំមិនចូលចិត្ត អ្នកណាថាឲ្យខ្ញុំនោះទេ
- ខ្ញុំមិនសូវពូកែនិយាយជាសាធារណៈនោះទេ ហើយខ្ញុំដឹងច្បាស់ថា វាគឺជាបញ្ហា បើខ្ញុំមិនមានជំនាញនេះ។ ខ្ញុំបានស្នើសុំទៅប្រធាន ដើម្បីចូលរួមវគ្គសិក្សានោះ។ គាត់ក៏យល់ព្រម ហើយខ្ញុំក៏បានចូលសិក្សាវគ្គសិក្សាដ៏ល្អនេះ ចុងក្រោយក៏អាចធ្វើឲ្យខ្ញុំយកឈ្នះ ភាពភ័យខ្លាចដែល តាមលងខ្ញុំជាយូរឆ្នាំមកហើយ។ ទោះបីជាចិត្តនៅតែមិនសូវចូលចិត្តវាក្តី ប៉ុន្តែខ្ញុំបានធ្វើបានយ៉ាងល្អ និងទទួលបានការសរសើរយ៉ាងច្រើន រាល់ ពេលដែលខ្ញុំនិយាយជាសាធារណៈម្តងៗ។
- ពេលខ្លះ ខ្ញុំយកចិត្តទុកដាក់ច្រើនពេកចំពោះការងារ ទោះបីការងារនោះស្រួលបំផុតក្តី ឬការងារអាចផ្ទេរឲ្យអ្នកដទៃធ្វើជំនួសក្តី។ ទោះបី បែបនេះក្ដី ការងារដែលខ្ញុំធ្វើមិនដែលហួសពេលកំណត់នោះទេ។
- ពីមុនខ្ញុំ ព្យាយាមធ្វើឲ្យសម្រេចការងារមួយហើយ ទើបធ្វើការងារមួយទៀត។ ប៉ុន្តែឥលូវ ខ្ញុំចូលចិត្តធ្វើការច្រើនក្នុងពេលតែមួយ ទោះបីមនុស្សភាគច្រើនគិតថា វាអាចប៉ះពាល់ដល់ប្រសិទ្ធភាពការងារក៏ដោយ។ ការបំពេញការងារច្រើន ក្នុងពេលតែមួយ អាចជួយឲ្យខ្ញុំ មានគំនិតច្នៃប្រឌិតច្រើន។
៤. តើប្រាក់ខែប៉ុន្មានដែលអ្នកចង់បាន?”
“តើប្រាក់ខែប៉ុន្មានដែលអ្នកចង់បាន?” គឺជាសំណួរសំខាន់មួយ ក្នុងចំណោមសំណួរ ទាំងឡាយដែលគេសួរក្នុងកំឡុងពេលសម្ភាសការងារ។ តើអ្នកឆ្លើយយ៉ាងដូចម្តេច ដើម្បី ទទួលបានពិន្ទុល្អ ក្នុងការសម្ភាសការងារនោះ?ការណែនាំ
បើអាចជៀសវាងបាន សូមកុំប្រាប់ពីចំនួនប្រាក់បៀវត្សជាក់លាក់ពេក។ អ្នកត្រូវប្រាប់ពួកគេ ពីប្រាក់បៀវត្សដែលយើងចង់បាន ក្នុងចន្លោះណាមួយ ប៉ុន្តែយើងត្រូវចងចាំថា មុនពេលកំណត់ សូមស្រាវជ្រាវឲ្យបានច្រើន ពីកម្រិតប្រាក់បៀវត្សសម្រាប់មុខតំណែងនេះ ឬក្នុងអង្គភាពនេះ។ ជៀសវាងក៏ទាមទារទាបពេក ឬខ្ពស់ពេកបើយើងមិនបានស្រាវជ្រាវនោះទេ។
បើសិនជាអ្នកសម្ភាសសួរបញ្ជាក់ពីប្រាក់បៀវត្សបច្ចុប្បន្ន ឬការងារពីមុន យើងត្រូវតែស្មោះត្រង់ ដោយបង្ហាញចំនួនពិតប្រាកដ ពីព្រោះយើងមិនអាចលាក់គេបានទេ ប្រសិនបើគាត់ចង់ដឹងនោះ។
លើសពីនេះ រឿងមួយដែលសំខាន់ជាងការបង្ហាញប្រាក់បៀវត្សដែល យើងចង់បាន គឺការបង្ហាញពីការប្តេជ្ញាចិត្ត និងសមត្ថភាពពិតប្រាកដ ដែលបញ្ជាក់ថាអ្នកពិតជាអាចទទួលខុសត្រូវការងារនេះបានល្អ។
ចម្លើយដែលមិនគួរឆ្លើយ៖
- តាមសមត្ថភាពជាក់ស្តែង និងអតិផរណាសព្វថ្ងៃ ខ្ញុំគិតថា ១,៥០០ដុល្លារ សមស្របបំផុតសម្រាប់ខ្ញុំ
- ប្រាក់ខែខ្ញុំបច្ចុប្បន្ន គឺ ១០០០ដុល្លារ ដូចនេះខ្ញុំត្រូវការ ១,៣០០ដុល្លារ
- ស្រេចតែលើគោលការណ៍ក្រុមហ៊ុនចុះ ខ្ញុំប៉ុន្មានក៏បានដែរ ឲ្យបានធ្វើការងារជាមួយក្រុមហ៊ុនរបស់លោក។
- ខ្ញុំពេញចិត្ត នឹងបំពេញការងារនេះ ជាងការគិតគួរតែប្រាក់បៀវត្ស។ ស្របពេលជាមួយការពេញចិត្ត ជំនឿចិត្ត និងសមត្ថភាពពិតប្រាកដ ខ្ញុំគិតថា ខ្ញុំនឹងទទួលបានការផ្តល់ជូនប្រាក់បៀវត្សសមរម្យបំផុតមួយ សម្រាប់ បទពិសោធន៍ជាងប្រាំឆ្នាំក្នុងវិស័យនេះ។ បន្ថែមពីលើនេះ ខ្ញុំគិតថា ប្រាក់បៀវត្សពិតជាសមស្រប សម្រាប់ជីវភាពរស់នៅក្នុងទីក្រុងភ្នំពេញនេះដែរ។
៥. “ហេតុអ្វី បានជាក្រុមហ៊ុនត្រូវជ្រើសរើសយកអ្នក?”
គោលបំណង
អ្នកសម្ភាសចង់ដឹងដំបូង ពីជំនឿចិត្ត និងការប្តេជ្ញាចិត្តរបស់អ្នកចំពោះការងារនោះ។ លើសពីនេះគេចង់ដឹងថា តើអ្នកមានលក្ខណៈសម្បត្តិអ្វីខ្លះ ដែលអាចបំពេញតួនាទី ឬការងារនោះបានល្អនោះ។
ការណែនាំ
ចម្លើយដែលអ្នក ត្រូវឆ្លើយទៅកាន់អ្នកសម្ភាស គឺអ្នកត្រូវបង្ហាញអំពីលក្ខណៈសម្បត្តិដែលអ្នកមាន ពិតជាសាកសមនឹងតួនាទី និងការងារនោះពិត ប្រាកដ។ ដើម្បីឆ្លើយបានត្រឹមត្រូវតាមអ្វីដែលគេចង់បាន អ្នកគួរតែចំណាយពេល បន្តិចមុនពេលសម្ភាស ដើម្បីផ្ទៀងផ្ទាត់ម្តងទៀត អំពីការទទួលខុសត្រូវ និងលក្ខខណ្ឌទាមទារ ដូចជាជំនាញ លក្ខណៈសម្បត្តិផ្ទាល់ខ្លួន និងកម្រិតអប់រំជាដើម សម្រាប់មុខតំណែងនោះ។ បើមិនបានរៀបចំមុនទេ ក្នុងពេលសម្ភាស អ្នកអាចទាញខួរក្បាលបន្តិច ដើម្បីគិតស្រមៃពីលក្ខខណ្ឌទាំងនោះ។ ដោយពេលវេលាខ្លី អ្នកមិនអាចលើកឡើងចំណុចទាំងអស់បានឡើយ អ្នកត្រូវជ្រើសរើសយកចំណុច សំខាន់ៗ ពីរឬបីចំណុចមកបង្ហាញបានហើយ។
ដោយសារមានបេក្ខភាពជាច្រើន ដែលជាគូប្រជែងក្នុងការងារនោះ ដូចនេះអ្នកត្រូវតែបង្ហាញពីចំណុច ឬសមត្ថភាពពិសេសខុសគេ ឬ ភាសាអង់គ្លេសហៅថា “Unique” ដែលអ្នកមាន ដើម្បីបញ្ជាក់ថា អ្នកគឺជាធនធានមនុស្សដ៏មាន តម្លៃពិតប្រាកដ។
សំណួរប្រហាក់ប្រហែលនេះ អ្នកសម្ភាសអាចសួរអ្នកថា “បើអ្នកជាខ្ញុំ (អ្នកសម្ភាស) តើអ្នកគួរជ្រើសយកអ្នកជាបុគ្គលិកដែរឬទេ? ហេតុអ្វី?” ឬគេអាចសួរអ្នកថា “តើអ្នកគិតថា អ្នកមានលក្ខណៈសម្បត្តិគ្រប់គ្រាន់សម្រាប់មុខ តំណែងនេះ ដែរឬទេ?”។ ពេលលឺសំណួរទាំងនេះ សូមកុំភ្ញាក់ផ្អើល ឬកុំគិតថា អ្នកសម្ភាសមើលស្រាលសមត្ថភាពរបស់អ្នក។ វាជាឱកាសរបស់អ្នកហើយ ត្រូវឆ្លើយជាមួយជំនឿចិត្តខ្ពស់ និងបង្ហាញចំណុចដែលត្រូវនឹងអ្វីដែលគេចង់បាន។
ចម្លើយដែលមិនគួរឆ្លើយ៖
- ពីព្រោះ ខ្ញុំគឺជាបេក្ខជនដែលសាកសមបំផុត សម្រាប់តំណែងនេះ។
- ខ្ញុំគិតថា ទុកឲ្យក្រុមហ៊ុនសម្រេចចុះ ខ្ញុំគ្មានយោបល់ទេ។
- ខ្ញុំធ្លាប់បានបំពេញការងារ ជាជំនួយការផ្ទាល់របស់អ្នកគ្រប់គ្រងទូទៅជាច្រើនឆ្នាំ។ ក្នុងមុខតំណែងនេះ ប្រធានរបស់ខ្ញុំតែងតែលើកឡើងថា ការងាររបស់គាត់ ក៏ដូចជាអង្គភាពនឹងជួបការលំបាក ប្រសិនបើគ្មានរូបខ្ញុំ។ ខ្ញុំក៏បានប្រើប្រាស់ពេលវេលា ដើម្បីអភិវឌ្ឍន៍ខ្លួនឯង ពិសេសជំនាញកុំព្យូទ័រ ដោយប្រើប្រាស់កម្មវិធីជាច្រើនដែលសម្រួលដល់ការចាត់ចែងការងារ។ លើសពីនេះ ខ្ញុំអាចប្រើប្រាស់ភាសាអង់គ្លេសបាន យ៉ាងស្ទាត់ជំនាញ បន្ទាប់ពីខ្ញុំបានប្រលងបញ្ចប់កម្រិតកំពូលនៅ មជ្ឈមណ្ឌលអូស្រ្តាលីសម្រាប់ការបណ្តុះបណ្តាល (ACE)។
- ក្នុងរយៈពេលជិត១៥ឆ្នាំ ក្នុងមុខតំណែងជាប្រធានផ្នែកលក់ ខ្ញុំបានអភិវឌ្ឍន៍ជំនាញលើកទឹកចិត្ត និងការបង្កើតក្រុមការងារដ៏ខ្លាំងក្លា។ ខ្ញុំធ្លាប់ទទួលបានពានរង្វាន់ជាប្រធានផ្នែកឆ្នើមបំផុតប្រចាំក្រុមហ៊ុន ពីរឆ្នាំជាប់ៗគ្នា ដោយខ្ញុំបានដឹកនាំក្រុមការងាររបស់ខ្ញុំ ឲ្យសម្រេចការលក់តាមគោលដៅដែលបានកំណត់។ ជាមួយការបង្កើតផែនការលក់ដ៏មានប្រសិទ្ធភាពរបស់ខ្ញុំ ម្ចាស់ក្រុមហ៊ុនរបស់ខ្ញុំបានយកផែនការនេះ ទៅដាក់ឲ្យប្រើប្រាស់ សម្រាប់ការលក់ក្នុងបណ្តាសម្ព័ន្ធក្រុមហ៊ុនផ្សេងទៀតរបស់គាត់។
0 comments:
Post a Comment